Umrangso-o ong•a obostani bidingo am•sandianiko dakna gita ISRO-oniko satellite-ni noksako bi•a : Assam

Guwahati, Jan 16: Assam a•dok sorkari, Dima Hasao-ni Umrangso-o ong•a obostani bidingo name am•sandianiko dakna gita batanggimin somoirango dam 220 koela a•kolrangni noksarangko satellite-oniko man•a gita ISRO aro International Satellite agency-rang baksa apsan kam ka•anggen, inenba Assam-ni Skotong Minister Himanta Biswa Sarma, Morigaon-o ong•atgipa Cabinet-ni tom•bimongani matchota jaman Bristibar salo parakataha.

Re•anggipa January jani 6 tariko, Umrangso-ni 3 Kilo jolo ong•a obostani jamano ia am•sandianiko dakataha, jeon sak 4 koela cho•giparang sia baksana sak 5 manderangko man•kujaenga.

Sorkari, 2024, 2020, 2014 aro una skangrangoni data-rangko nigrike koela cho•ani kamrangko basakoni a•bachengataha uko ma•sina gita Revenue and Disaster Management Department-rangko satelite-ni noksarangko jakkalchina gita aganataha ine u•iataha.

Cabinet, mikkangchi indakgipa obostarangko champengsona koela a•kolrangko kolgapatna gita Central Mine Planning and Design Institute (CMPDI)-ni kupattianiko ra•na tik ka•angaha. Ia koelarngko cho•ani a•sel matburingrangba siaha ine koborrangko man•enga, ineba Skotong Minister agandapangkuaha.

Naljokatgipa dolrang naljokatani kamrangni bidingo cabinet-na kan•dike talate on•angaha. Geological Survey of India (GSI), Coal India aro National Disaster Response Force (NDRF) dolrang, koela a•kolo kror 14 litre mangni gita chirang donga ine parakataha jeonikon, kror 4 litre mangni gita chirangkode galna gita man•aha.

U•igipa manderangni chanchichipe aganani gitade, ia chirangko bonne galna gitade sal 25-oni sal 60-rangde nangnaba donga ine u•iatengon, a•dokni cabinet, Indian Army aro uamangni engineer sipai dolrangni dakchakniko ra•angkuna gita tik ka•angaha, ineba Sarma aganaha.

Assam sorkari, ia ong•a obostani bidingo am•sandianiko dakna gita kamoni neng•takgimin Guwahati High Court-ni judge Justice Anima Hazarika-ni dilanio judicial inquiry-ko dakatchina gita ge•etaniko on•ataha aro iani bidingo ja 3-ni gisepon am•sandianirangko matchotatna gita ka•dongsoenga.

Ia ong•a obostani bidingo, FIR-o pangchake am•sandianiko dakna gita Director General of Police (DGP)-ko Special Investigation Team (SIT)-ko bikotchina gita u•iataha, jekon Justice Hazarika nirokaniko dakanggen.

Jolo niamgri koela cho•anirangko bon•atsrangna gita Mines and Minerals Department-rangkoba Central-ni agency-rang baksa apsan kam ka•na gita u•iataha.

A•dokni Skotong Minister, manggisi man•kugijagiparangko man•chape sak 9 koela cho•giparangni nokdangni manderangna tangka gong lakh 10-ko on•gen ineba parakataha.

Na·simang ia video-koba nina man·gen:

Na·simang iakoba poraina man·gen: Dibrugarh-o me•chik saksako til•ekdrae so•otgalanina cha bagan dakgipa jatrang jingjengata

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub

The post Umrangso-o ong•a obostani bidingo am•sandianiko dakna gita ISRO-oniko satellite-ni noksako bi•a : Assam appeared first on Hub News.